सप्तरी । सप्तरीको राजविराजस्थित सिराहा रोडमा बस्ने प्रदेश सभा सदस्य किरण कुमारी साह पारिवारिक विवादमा तानिएकी छन्। उनलाई आफ्ना सासू–ससुरालाई घरबाट निकालेर घरजग्गा कब्जा गरेको आरोप लागेको छ।
उनका ८० वर्षीय ससुरा देवनारायण प्रसाद साह र सासू शान्तिदेवीले सामाजिक सञ्जालमा भिडियो सन्देश जारी गर्दै बुहारी किरण साह र उनका छोरा इन्जिनियर विनोद साहमाथि शारीरिक र मानसिक दुर्व्यवहारको आरोप लगाएका छन्। देवनारायण साहका अनुसार असोज २० गते मन्दिर जानुका बेला घरको दराज फोडेर नागरिकता, जग्गा र घरसम्बन्धी कागजात चोरी गरिएको थियो र सोधपुछका क्रममा आफू र श्रीमतीलाई कुटपिट गरी घरबाट निकालिएको दाबी गरिएको छ।
उनले जिल्ला प्रशासन कार्यालय सप्तरीमा औपचारिक उजुरी पनि दर्ता गराइसकेका छन्। कात्तिक २ गते फेरि कुटपिट भएको आरोप पनि उनले लगाएका छन्। देवनारायणले बुहारीलाई पदको दुरुपयोग गरेर प्रहरी र प्रशासनमा प्रभाव जमाउने प्रयास गरेको आरोप पनि लगाएका छन्।
तर किरण कुमारी साहले आफूमाथि लगाइएका सबै आरोप निराधार भएको दाबी गर्दै यसलाई राजनीतिक रङ दिइएको पारिवारिक झगडा भएको बताएकी छन्। उनले भनिन्, “चाडपर्वको तयारीका क्रममा ससुरा र श्रीमानबिच सामान्य विवाद भएको थियो, तर त्यसलाई अनावश्यक रूपमा ठुलो बनाइएको छ।”
सांसद साहले आफ्नो सासू–ससुरालाई घरबाट ननिकालेको र बरु उनीहरू आफैँ छोरीको घरमा गएको पनि दाबी गरेकी छन्। कुटपिटसम्बन्धी आरोप खण्डन गर्दै उनले भनिन्, “मेरो श्रीमानले हातपात गरेको होइन, बरु ससुराले हातपात गर्न खोज्दा मैले बचाउ गरेकी हुँँ।”
प्रहरी प्रशासनले दुवै पक्षलाई वार्ताका लागि बोलाउने तयारी गरिरहेको छ। जिल्ला प्रशासन कार्यालय सप्तरीका अनुसार देवनारायण साहको उजुरी दर्ता भइसकेको छ।
राजनीतिक पृष्ठभूमिस् यस विवादमा जसपा र जनमत पार्टी बीचको पुरानो प्रतिद्वन्द्विता पनि देखिएको बताइन्छ। कतिपयले विवाद पारिवारिक मात्र नभएर राजनीतिक प्रभावयुक्त भएको तर्क गरेका छन्।
हाल स्थानीय प्रशासनले दुवै पक्षबीच वार्ता मार्फत विवाद सुल्झाउने प्रयास गरिरहेको छ, तर सार्वजनिक आरोप–प्रत्यारोपका कारण यो विवाद चाँडै शान्त हुने सम्भावना कम देखिन्छ।
