बारा । बाराको कलैयास्थित बाल एकता इङ्लिस बोर्डिङ स्कुलका प्रिन्सिपल रुपेश स्वर्णकारको हत्यामा संलग्न रहेको आशंकामा प्रहरीले तीनजना भारतीयसहित ६ जनालाई पक्राउ गरेको छ । ६ हत्यामा संलग्न हुन सक्ने आशंकामा अनुसन्धानका लागि ६ जनालाई पक्राउ गरेको बाराका प्रहरी प्रवक्ता डिएसपी दधीराम न्यौपानेले जानकारी दिए ।
पक्राउ पर्ने एकजना महिला उनकै विद्यालयमा काम गर्ने पूर्व शिक्षिका रहेको प्रहरी स्रोतले जनाएको छ । आपसी सम्बन्ध एवं रिसिबीको कारण स्वर्णकारको हत्या भएको हुन सक्ने प्रहरीको अनुमान छ ।
पक्राउ परेकाहरुको नाम भने प्रहरीले खुलाएको छैन । सोमबार दिउँसो दुई वटा मोटरसाइकलमा चारजनाको समूहमा आएको अज्ञात समूहले स्वर्णकारमाथि गोली प्रहार गरेर भागेका थिए ।
टाउको तथा छातीमा गोली लागेर गम्भीर घाइते भएका स्वर्णकारको उपचारका क्रममा वीरगन्जस्थित बयोधा अस्पतालमा मृत्यु भएको थियो । घटना विषयमा थप अनुसन्धान गरिरहेको जिल्ला प्रहरी कार्यालय बाराले जनाएको छ ।
