नयाँदिल्ली — कश्मीरमा हिन्दुमाथिको आक्रमणको सिलसिला बढ्दै गएको छ । नयाँ वर्षका दिन कश्मीरको राजौरीमा चार जना हिन्दुलाई उनको नाम सोधेरै हत्या गरिएको घटना बाहिर आएको छ । एक दिनपछि त्यही स्थानमा गराइएको विस्फोटमा दुई बालिका मारिएका छन् ।
आइतबार राजौरीमा आतंकवादीले गरेको गोली प्रहारका कारण चार जनाको मृत्यु र सात जना गम्भीर घाइते भएका थिए । शोकमग्न स्थानीयले घटनाको विरोधमा सोमबार प्रदर्शन गरिरहँदा गराइएको विस्फोटमा चार वर्ष र १६ वर्षकी दुई जना बालिकाको मृत्यु भएको हो । सात जना घाइते भएका छन् । लगातार भएका घटनाले कश्मीरमा हिन्दुहरूको सुरक्षालाई लिएर प्रश्न उब्जिएको छ ।
गतवर्ष हिन्दुलाई लक्षित गरी भएका हत्याको संख्या बढेको थियो । पछिल्लो समय विभिन्न सरकारी कार्यालय, स्कुल र बजारमा समेत हिन्दुलाई लक्षित गरी हत्या हुने गरेको छ । यसअघि सुरक्षाबल र आतंकवादी भिडन्तका घटना बढी सुनिन्थे । कश्मीरका नेताहरूले घटनालाई देशमा विकसित राजनीतिक घटनाक्रमसँग जोडेका छन् ।
पूर्वमुख्यमन्त्री फारुक अब्दुल्लाहले देशभरि फैलाइएको विद्वेषको राजनीतिको परिणाम कश्मीरमा देखिएको उल्लेख गरेका छन् । ‘देशमा मुसलमान र हिन्दुको राजनीति गरिएको छ, दुवै समुदायलाई अलग उभ्याइएको छ । यसको जिम्मेवार को हो ?’ उनको प्रश्न छ । नेसनल कन्फरेन्सका नेता उमर अब्दुल्लाहले सुरक्षाबलको लापरबाहीले घटनामा वृद्धि भइरहेको प्रतिक्रिया दिएका छन् । ईकान्तिपुरमा प्रकाशित
