शुभ नारायण यादव-
सप्तरी । अहिले सप्तरीको बजारहरुमा दैनिक उपभोग्य सामग्री सहित अतिआवश्यक वस्तुहरुमा अत्याधिक मूल्य वृद्धि भएपछि उपभोक्ताहरु मारमा परेका छन् ।
पछिल्लो समय पेट्रोल, डिजल, मट्तिेल, खाना पकाउने ग्यास, खाद्यान्न, औषधी, लत्ताकपडा र तरकारीको मुल्य निरन्तर बढ्दै गएको छ । तर, बजार अनुगमन समितिले यसको नियन्त्रणका लागि कुनै प्रयास गरिरहेको देखिन्न ।
दशैंको बेला अनुगमन समितिले अग्रसरता देखाएको थियो । तिहारको नजिकिदै जाँदा पुनः अनुगमन समितिले म्याद गुज्रेका र अखाद्यय बस्तु नियन्त्रणमा लिई नष्ट गर्ने तथा दर्ता नभई संचालनमा रहेका पसल र उद्योगका संचालकलाई जरिवाना गर्ने काम तिब्र बनाए पनि सामाग्रीहरुको मूल्य नियन्त्रणका लागि कुनै ठोस पहल गर्न सकेको छैन ।
स्थानीय उपभोक्त ताराकान्त साहले इन्धनसहित खाने तेल, खाद्यान्न, लत्ताकपडा र तरकारी लगायतका वस्तुको निरन्तर मूल्य बढ्दै गएको र व्यापारीले मनोमानी मूल्य तोक्दासमेत यसलाई नियन्त्रणको पहल कुनै निकायबाट हुन नसकेको आरोप लगाए ।
खाद्यान्न सामाग्रीहरु मध्ये सबै भन्दा बढी हरियो सागसब्जी तथा तरकारीमा मूल्य निकै बढेको छ । अहिले बजारमा प्याज ८०, काउली २ सय, भान्टा १ सय ५०, परवल १ सय, आलु ७० प्रतिकिलो रहेको छ भने खानेतेल ३ सयदेखी ४ सय सम्म प्रति लिटर विक्री भइरहेको छ ।
यस्तै अन्य दैनिक उपभोग्य सामाग्रीहरुमा पनि मूल्य निरन्तर बढीरहेको सर्वसाधारणको गुनासो छ ।
यसैगरि तिहारलाई अतिआवश्यक चिनी, पिठो, मैदा, काजु, किसमिस, नरिवल, सहोरा, ओखर, घर सजाउन प्रयोग गरिने रंगरोहन र विद्युतीय सामाग्रीसमेतको बजारमा मूल्य मनपरी कायम गरिएको सर्वसाधारणले गुनासो गरेका छन् ।
