काठमाडौं । बंगलादेश सम्पादक परिषद्ले देशभरका पत्रकारविरुद्ध दर्ता गरिएका झुटा तथा दुःख दिने उद्देश्यका मुद्दा तत्काल फिर्ता लिन सरकारसँग माग गरेको छ । परिषद्का अध्यक्ष नुरुल कबीर र महासचिव देवान हानिफ महमुदको तर्फबाट जारी विज्ञप्तिमा यस्तो माग गरिएको हो ।
विज्ञप्तिअनुसार सन् २०२४ अगस्ट ५ यता देशका विभिन्न स्थानमा पत्रकारविरुद्ध थुप्रै झुटा हत्या मुद्दा तथा अन्य उत्पीडनात्मक मुद्दा दर्ता भएका छन् । ती मुद्दाका कारण धेरै पत्रकार नियमित रूपमा अदालत धाउन बाध्य भएका छन् । यसले उनीहरूको नियमित पेशागत गतिविधिमा अवरोध सिर्जना गर्नुका साथै सञ्चारमाध्यमको स्वतन्त्रतालाई कमजोर बनाएको परिषद्ले जनाएको छ ।
“यदि कुनै पत्रकारविरुद्ध ठोस र प्रमाणमा आधारित आरोप छन् भने विद्यमान कानुनअनुसार निष्पक्ष न्यायिक प्रक्रियाबाट समाधान हुनुपर्छ,” विज्ञप्तिमा भनिएको छ, “तर राजनीतिक प्रेरित र दुःख दिने उद्देश्यका मुद्दा कुनै पनि अवस्थामा स्वीकार्य हुँदैनन् ।”
परिषद्ले यसअघि पनि अन्तरिम सरकारलाई झुटा तथा प्रेरित मुद्दा फिर्ता लिन र पत्रकारमाथिको उत्पीडन रोक्न प्रभावकारी कदम चाल्न पटक–पटक आग्रह गरेको जनाएको छ । सरकारले मुद्दा पुनरावलोकन गर्ने र झुटा तथा उत्पीडनात्मक मुद्दा फिर्ता लिने आश्वासन दिए पनि यस विषयमा अर्थपूर्ण प्रगति नभएको परिषद्को भनाइ छ ।
सम्पादक परिषद्ले नवनिर्वाचित सरकारलाई यस विषयलाई उच्च प्राथमिकतामा राखी पत्रकारविरुद्ध दर्ता गरिएका झुटा तथा दुःख दिने उद्देश्यका मुद्दा तुरुन्त फिर्ता लिन ठोस कदम चाल्न आग्रह गरेको छ । लोकतान्त्रिक राज्यको आधारभूत प्रतिबद्धता नै सञ्चार स्वतन्त्रता र पेशागत सुरक्षाको सुनिश्चितता भएको उल्लेख गर्दै परिषद्ले पुनः सो अपेक्षा दोहो¥याएको छ ।
एएनआई
