संजय यादव
नेपालको शिक्षा प्रणाली आज फेरि लज्जित भएको छ। सरकारको असक्षमता, शिक्षक-प्रशासनको गैरजिम्मेवारीपन, र निजी विद्यालयहरूको नाफाखोर प्रवृत्तिले गर्दा एसईई परीक्षाको विश्वासनीयता हरेक वर्ष संकटकालीन अवस्थामा पुग्छ। आजैदेखि सुरु भएको परीक्षा फेरि पनि अमर्यादित तरिकाले सुरु भएको छ। २० मिनेट नबित्दै प्रश्नपत्र बाहिरिएको घटनाले हाम्रो शिक्षाको स्खलनलाई उजागर गरेको छ। यो के प्रमाण हो? के प्रहरी प्रशासन, शिक्षक, केन्द्राध्यक्ष सबै माटोका मूर्तिहरू मात्र हुन्? कि उनीहरू यो प्रहसनका साझेदार हुन्?
शिक्षा भनेको केवल परीक्षा पास गरेर प्रमाणपत्र लिने प्रक्रिया मात्र होइन। यो व्यक्तित्व निर्माणको आधारशिला हो। तर नेपालमा परीक्षा प्रणालीले इमानदार नागरिक होइन, चोर र धुर्त उत्पादन गरिरहेको छ। निजी विद्यालयहरूले विद्यार्थीलाई अनुशासित बनाउने होइन, प्रतिस्पर्धामा अगाडि देखाउन अवैध हतकण्डा अपनाउँदैछ। नक्कलको खेल, पैसा दिएर पास गराउने प्रवृत्ति, र कमिसनका आधारमा अंक दिने प्रवृत्तिले गर्दा शिक्षा गम्भीर संकटमा छ।
यो केवल एउटा प्रश्नपत्र बाहिरिने घटना मात्र होइन। यो सम्पूर्ण शिक्षा प्रणालीमाथिको एक घातक प्रहार हो। सरकार शिक्षामा सुधार ल्याउने गफ गर्छ, तर परिणाम उल्टो देखिन्छ। नीति निर्माताहरूलाई शिक्षाको गुणस्तरभन्दा पनि ठेक्का पट्टाको चिन्ता छ। विद्यालयहरूले नैतिक शिक्षा दिनुपर्ने हो, तर तिनीहरू अनुशासनहीनता र भ्रष्टाचारको पाठशाला बनेका छन्।
अब समय आइसक्यो– शिक्षा प्रणालीमाथि दरो झापड हान्ने! अब साना सुधारका गफले केही हुनेवाला छैन। क्रान्तिकारी परिवर्तन आवश्यक छ। परीक्षालाई निष्पक्ष बनाउन प्रविधिको अधिकतम प्रयोग, कडाइपूर्वक निगरानी, अनियमिततामा संलग्न सबैलाई कारबाही, र शिक्षालाई व्यावसायीकरणको दलदलबाट मुक्त गर्ने द्रष्टव्य रणनीति चाहिन्छ। अन्यथा, हाम्रा विद्यालयहरूबाट राष्ट्रनिर्माणका संवाहक होइन, राष्ट्र डुबाउने धोकेबाजहरू उत्पादन भइरहनेछन्।
अब पनि यदि शिक्षा प्रणाली सुधार्न सरकारले आँखा चिम्लिरहन्छ भने यो मुलुकको भविष्य थप अन्धकारमय हुनेछ। यसका लागि नक्कल र भ्रष्टाचारविरुद्ध बोल्ने मात्र होइन, कठोर कदम चाल्ने समय आएको छ।
यो खबर पढेर तपाईलाई कस्तो महसुस भयो ?
+1
+1
+1
+1
+1
+1
+1
