अनुशासन र राष्ट्रसेवाको शिक्षामा १०० दिने तालिम सम्पन्न

महेश सिंह सिरहा,माघ २५ – राष्ट्रिय सेवा दलद्वारा संचालित १०० दिने एनसीसी तालिम कार्यक्रम सिरहाको विभिन्न विद्यालयमा भव्य रूपमा सम्पन्न भएको छ। “अनुशासन नै राष्ट्र सेवाको मूल जग हो” भन्ने मूल नाराका साथ आयोजित यो तालिमले विद्यार्थीहरूलाई शारीरिक, मानसिक, सामाजिक, र सांस्कृतिक पक्षमा सशक्त बनाउन महत्वपूर्ण योगदान दिएको छ।
तालिममा सिरहाको मोहन मावि मिर्चैया र श्री पशुपति आदर्श मावि लहानका १८/१८ जना छात्र-छात्रा गरी प्रत्येक विद्यालयबाट ३६ जना सहभागी थिए। ७९ दिनको नियमित तालिम र २१ दिनको सामूहिक क्याम्प गरी कुल १०० दिनको तालिम सम्पन्न भएको हो।

तालिम समापन समारोह पशुपति आदर्श मावि लहानमा आयोजना गरिएको थियो। प्रमुख अतिथि प्रमुख सेनानी सुमन श्रेष्ठले अनुशासन र तालिमको महत्त्वबारे प्रकाश पार्दै, सिकाइलाई व्यवहारमा उतार्न विद्यार्थीहरूलाई प्रेरित गरे। उनले भने, “यो तालिमले विद्यार्थीहरूलाई आत्मरक्षा, समय व्यवस्थापन, र समाजप्रतिको दायित्व बोध गराउने दिशामा अभूतपूर्व योगदान दिएको छ।”
विशिष्ट अतिथि विद्यालयका प्रधानाध्यापक डा. महेन्द्रप्रसाद चौधरीले यस्तो खालका तालिमले विद्यार्थीहरूको शैक्षिक मात्र नभई व्यावहारिक ज्ञान पनि अभिवृद्धि हुनेमा जोड दिए। कार्यक्रममा एनसीसी अल्मुनाई एशोसिएशनका सिरहा जिल्ला निर्देशक लक्ष्मण शर्मा,  नेपाल बीबीसी अन्लाईन न्यूजका पत्रकार महेश सिंह र अभिभावकहरूको उपस्थिति रहेको थियो।

विद्यालय व्यवस्थापन समितिका अध्यक्ष धिरेन्द्र कुमार चौधरीको अध्यक्षतामा सम्पन्न कार्यक्रममा विद्यार्थी, शिक्षक, र अभिभावकले तालिमको अनुभव र महत्वबारे खुलेर चर्चा गरे।
तालिममा आत्मरक्षा, सीपमूलक ज्ञान, समाजप्रतिको दायित्व, समय व्यवस्थापन,कला, र सांस्कृतिक गतिविधिलाई समेटी विद्यार्थीहरूको सर्वांगीण विकासलाई प्राथमिकता दिइएको आयोजकले जानकारी दिएको छ। विद्यालयले आगामी दिनमा पनि यस्ता तालिमहरू आयोजनाको अपेक्षा राख्दै सहभागी विद्यार्थी, अभिभावक र आयोजकलाई धन्यवाद ज्ञापन गरेको छ।