सप्ताहव्यापी सीताराम विवाहपञ्चमी महोत्सव रामकलेवाको विधिसँगै शनिबार सम्पन्न भएको छ। जानकी मन्दिर परिसरमा आयोजित कार्यक्रममा जन्तीका रुपमा आएका साधु–सन्तलाई ५६ प्रकारका मिष्टान्न भोजन खुवाएर सम्मानपूर्वक विदाई गरिएको हो।
शुक्रबार राम र सीताको वैवाहिक कार्यक्रम सम्पन्न भएपछि शनिबार राम, लक्ष्मण, भरत, शत्रुघ्नको प्रतीकात्मक बालरुपका साथ साधु–सन्तलाई भोजन गराउने र गालीगीतमार्फत स्वागत गर्ने परम्परागत कार्यक्रम सम्पन्न भयो। उनीहरूलाई दानदक्षिणा दिँदै विदाई गरियो। यस विधिलाई स्थानीय रूपमा “रामकलेवा“ भनिन्छ।
रामकलेवा अवलोकन गर्न ठूलो संख्यामा भक्तजनहरूको उपस्थिति रहेको थियो। यससँगै मंसिर १६ गतेदेखि सुरु भएको विवाहपञ्चमी महोत्सव औपचारिक रूपमा समापन भएको छ।
म पहिलो दिन नगरदर्शन, दोस्रो दिन फुलवारी लीला, तेस्रो दिन धनुषा यज्ञ, चौथो दिन तिलकोत्सव, पाँचौं दिन मटकोर, र छैटौं दिन विवाहपञ्चमी सम्पन्न भएको थियो ।
त्रेतायुगमा मंसिर शुक्ल पञ्चमीको दिन भगवान राम र माता सीताबीच भएको आदर्श विवाहको सम्झनामा प्रत्येक वर्ष जनकपुरधाममा यो महोत्सव भव्य रूपमा मनाउने परम्परा छ।
