राष्ट्रसङ्घको महासभामा जाँदै प्रधानमन्त्री, नरेन्द्र मोदीसँगको भेटमा जोड

तर विगतमा ओलीले सत्ता सम्हाल्दा उपप्रधानमन्त्री तथा परराष्ट्रमन्त्री रहेका कमल थापा नयाँ गठबन्धन निर्माण भइसकेपछि भारतसँगको सम्बन्धमा ‘अन्योल देखिएको’ ठान्छन्।

उनले भने, “योभन्दा अघि प्रधानमन्त्री निर्वाचित वा नियुक्त हुनेबित्तिकै टेलिफोनबाटै त्यहाँका प्रधानमन्त्रीले बधाई दिने प्रचलन थियो, यस पटक त्यो देखिएन। सरकार गठन भइसकेपछि चाँडोभन्दा चाँडो भारत आउन निम्तो दिने चलन थियो, त्यो पनि अहिलेसम्म प्राप्त भएको छैन। बाहिरबाट हेर्दा यी सबै घटनाबाट सरकार परिवर्तनप्रति (भारत) उत्साहित भएको देखिदैँन।”

भारतका कतिपय अधिकारीसँगको आफ्नो कुराकानी उद्धृत गर्दै थापाले नेपालमा बारम्बार भइरहेका सरकार परिवर्तनका घटनाका कारण दिल्लीले ‘गठबन्धन कस्तो बन्यो भन्दा पनि जो सत्तामा आयो ऊसँग सामान्य ढङ्गले व्यवहार गर्ने’ र उसले ‘कसरी भारतसँगको सम्बन्ध अघि बढाउन चाहन्छ, त्यो हेरेर अघि बढ्ने’ नीति लिएको जस्तो देखिएको उल्लेख गरे।

उनी भन्छन्, “त्यसबाट नै एक किसिमको चिसो प्रतिक्रिया देखिन्छ। प्रधानमन्त्री केपी ओलीले आफ्नो सरकार ‘भारतसँग राम्रो सम्बन्ध राख्न चाहन्छ। विगतका कमीकमजोरी सच्याएर नयाँ ढङ्गले अघि बढ्न चाहन्छ। यो सरकार परिवर्तन नेपालको राजनीतिक प्रणालीअन्तर्गत भइरहने कुरा हुन्। सम्बन्ध हामी राख्न राख्न चाहन्छौँ’ भनेर (भारतलाई भन्न) खोजिरहनुभएको छ।”

मोदीसँग भेटघाट मिलाउन भइरहेका प्रयासलाई कसरी हेर्ने?

पूर्वपरराष्ट्रमन्त्री थापा भारतका प्रधानमन्त्रीसँग न्यूयोर्कमा भेटवार्ता मिलाउनका लागि नेपाल सरकारले अहिले गरिरहेको प्रयास ‘अस्वाभाविक’ भएको ठान्छन्।

उनले भने, “दुई प्रधानमन्त्री न्यूयोर्कमा रहँदा जम्मा एक दिनको समय छ। एक दिनको समयमा त्यस्तो ठोस केही कुरा पनि हुन सक्दैन। मोदीको आफ्नै व्यस्त कार्यतालिका छ। त्यसमा यसरी अपहत्ते गरेको चाहिँ हाम्रो कूटनीतिक क्षेत्रमा अस्वाभाविक जस्तो मैले देखिरहेको छु। अहिले भएन भने फेरि भइहाल्छ। यसरी प्रयास गर्नु आवश्यक नै थिएन।”

थापा भारतीय प्रधानमन्त्रीसँग ‘सौहार्दपूर्ण सम्बन्ध’ बढाउन सरकारले प्रयास गरेको देखिएपनि ‘अपहत्ते गर्दा’ त्यसले नोक्सान पुर्‍याउन सक्ने सम्भावना औँल्याउँछन्।

तर पूर्वपरराष्ट्रमन्त्री महासेठले सरकारको पहिलो प्राथमिकता राष्ट्रसङ्घको महासभा नै भएको उल्लेख गर्दै त्यहाँ गएको बेला ‘भारत र चीनबाट जाने सरकार प्रमुखहरूसँग भेटघाट हुन सक्यो भने त्यो राम्रो’ हुने प्रतिक्रिया दिए।

भारतलाई आफूहरूले दिन चाहेको सन्देशबारे उनी भन्छन्, “हामी भारतलाई जस्तो हिजो हुनुहुन्थ्यो, आज पनि त्यस्तै हुनुहुन्छ भनेर सन्देश दिन खोजिरहेका छौँ। इतिहासदेखि जस्तो सम्बन्ध थियो, त्यसलाई हामी निरन्तरता दिन चाहन्छौँ। जुन दुईवटा ठूला छिमेकी देशहरूको बीचमा हामी बसेका छौँ, दुवैसँग समान व्यवहार गर्न चाहन्छौँ।”

नेपालबाट भारतविरोधी गतिविधि नभएको र हुने सम्भावना पनि तत्काल नरहेको उल्लेख गर्दै नेपालको सत्तापक्ष र प्रतिपक्ष दुवै संवादको माध्यमबाट त्यसलाई हल गर्दै जाने विगतको अडानमा आफूहरू कायम रहेको उनले बताए।