विराटनगर । संविधानसभा सदस्य आशाकुमारी सरदार मोरङको जहदा गाउँपालिका उपाध्यक्षको उम्मेदवार बनेकी छन् । नेपाली कांग्रेसबाट टिकट नपाएपछि उनी उपाध्यक्षको स्वतन्त्र उम्मेदवार बनेकी हुन् ।
सरदार २०६४ सालको समानुपातिक तर्फको संविधानसभा सदस्य हुन् । उनी विजयकुमार गच्छदारले नेतृत्व गरेको मधेशी जनअधिकार फोरम लोकतान्त्रिक हुँदै नेपाली कांग्रेसमा आएकी थिइन् ।
पार्टीले टिकट नदिएपछि आफूले बागी उम्मेदवारी दिएको उनले बताइन् । ‘मलाई अरु पार्टीले रातो कार्पेट ओछ्याएर बोलाएका थिए, तर म गइन,’ उनले भनिन्,‘ पार्टीले टिकट नदिएपछि स्वतन्त्र उम्मेदवार बनेकी हुँ ।’
उनी नेपाली कांग्रेसको महाधिवेशन प्रतिनिधि हुन् । निर्वाचन आयोगले सरदारलाई लालटिन चुनाव चिन्ह दिएको छ । चुनाव चिन्ह पाएसँगै उनी भोट माग्न व्यस्त छिन् ।
जहदा गाउँपालिका अध्यक्षमा नेपाली कांग्रेसले जयप्रकाश थारु र उपाध्यक्षमा भुखनीकुमारी माझीलाई उम्मेदवार बनाएको छ ।
