काठमाडौँ । आगामी वैशाख ३० गते हुने निर्वाचन मधेश प्रदेशमा रोक्न सर्वोच्च अदालतमा परेको रिट निवेदनलाई सर्वोच्चले दरपिठ गरेको छ।
महोत्तरीको भंगहा नगरपालिकाका प्रमुख संजिव कुमार साहले संविधानको धारा २१५ र २१६ अनुसार स्थानीय तहमा निर्वाचित पदाधिकारीको कार्यकाल पाँच वर्ष हुने हुँदा उक्त कार्यकाल पुरा भएपछि मात्रै चुनाव हुनुपर्ने माग दाबीसहित दिएको निवेदनलाई सर्वोच्च प्रशासनले दरपिठ गरेको हो।
तत्कालिन प्रदेश २ मा २०७४ सालमा स्थानीय तहको चुनाव असोज २ गते चुनाव भएको थियो।
वैशाख ३० गते नै चुनाव गर्दा धारा २१५ र २१६ अनुसारको पाँच वर्षे कार्यकाल पुरा हुन नपाउने जिकिर निवेदकले गरेका थिए।
यता सर्वोच्चका प्रवक्ता बाबुराम दाहालले स्थानीय तह निर्वाचन ऐनले चुनावका बारेमा प्रष्ट पारेकाले त्यसकै आधारमा रिट निवेदन दरपिठ गरिएको जानकारी दिए।
‘स्थानीय तहको चुनाव जति चरणमा भए पनि पहिलोपटक भएको चुनावलाई आधार मान्ने भन्ने कानुनी व्यवस्था भएकाले पहिलोपटक चुनाव भएका ठाउँका पदाधिकारीले पाँच वर्षे कार्यकाल पुरा गर्ने अवस्था देखिएकाले निवेदन दरपिठ गरेका छौँ’, उनले भने ।
प्रशासनको निर्णयविरुद्ध निवेदकले इजलासमा निवेदन दिन सक्नेछन्।
सरकारले वैशाख ३० एकै चरणमा स्थानीय तहको चुनाव गर्ने घोषणा गरिसकेको छ । रिट निवेदन दिएका साह लोसपाका नेता हुन् ।
